211 դիտում

Աշխարհի տարբեր երկրներից նյարդաբանության, նեյրովիրաբուժության, անեսթեզիոլոգիայի և ռադիոլոգիայի ոլորտների ավելի քան 100 առաջատար նեղ մասնագետներ  Երևանում  հայ գործընկերների հետ կկիսվեն  էպիլեպսիայի ախտորոշման, բուժման և հիվանդների բուժական արդյունքների ոլորտում վերջին ձեռքբերումներով։

«Արմենպրես»-ի հետ զրույցում «Արաբկիր» բժշկական համալիրի Մանկական նյարդաբանության և էպիլեպտոլոգիայի ծառայության ղեկավար, էպիլեպսիայի դեմ պայքարի հայկական լիգայի նախագահ Բիայնա Սուխուդյանը նշեց, որ հայտնի նեյրովիրաբույժ, պրոֆեսոր Էդգար Հովսեփյանի անվան 4-րդ կլինիկական նյարդաբանության երկօրյա գիտաժողովը, որը մեկ հարկի տակ է հավաքել Ավստրիայից, Բուլղարիայից, Իսպանիայից, Խորվաթիայից, Միացյալ Նահանգներից, Ռուսաստանից և Վրաստանից առաջատար մասնագետներին, նվիրված է էպիլեպսիայի ախտորոշման, բուժման և արդյունքների բարելավման հարցերի քննարկմանը։

«Մեր եվրոպացի ընկերների հետ համագործակցելու արդյունքում  կարողացել ենք ներդնել էպիլեպսիայի վիրաբուժությունը Հայաստանում։  Այս մասնագետներն այստեղ են կիսվելու իրենց փորձով, գիտելիքներով, նոր գիտելիքներ ձեռք բերելու։ Յուրաքանչյուր բժշկի գերնպատակն է մաքսիմալ լավացնել հիվանդի կյանքի որակը»,-ասաց Սուխուդյանը՝ հավելելով, որ գիտաժողովի քննարկումները նվիրված են լինելու նաև  էպիլեպսիայի գենետիկ բուժումներին, բուժման  ներառական մեթոդներին։

Քեյս Վեսթերն Ռեզերվ համալսարանի Քլիվլենդի կլինիկայի Լերներ բժշկական քոլեջի անեսթեզոլոգիայի պրոֆեսոր, նյարդաբանական, անեսթեզիոլոգիայի և ինտենսիվ թերապիայի միության նախագահ, ICPNT խորհրդի անդամ Րաֆֆի Ավետիսյանի խոսքով՝ Երևանում են համաշխարհային ոլորտում մեծ ճանաչում ունեցող մասնագետները, որոնք տեղում քննարկելու են տարբեր երկրների փորձը, կիսվելու են  իրենց երկրներում կիրառվող նորարարություններով։

«Հայաստանում էպիլեպսիայի վիրաբուժությունը համեմատաբար նոր է։ Դեղորայքային բուժումը կա, ախտորոշումը կա, մենք պետք է հասնենք նրան, որ հիվանդն առանց ցնցումների կարողանա երկարատև ապրել։ Ուղեղը շատ զգայուն է, և բարդ է գտնել ցնցման պատճառները։ Ես այստեղ եմ կիսվելու իմ փորձով և ձեռք բերելու նոր գիտելիքներ»,-ասաց նա՝ հավելելով, որ էպիլեպսիայի դեղորայքային բուժման նորարական մեթոդները թույլ են տալիս մարդուն ավելի լավ կառավարել իր կյանքը։

«Արաբկիր» բժշկական համալիրի կառավարման խորհրդի նախագահ Արա Բաբլոյանն էլ հավելեց, որ նման գիտաժողովները թույլ են տալիս ավելի լավ ծանոթանալ ոլորտում առկա խնդիրներին։

«Ես, լինելով առողջապահության կազմակերպիչ, չեմ կարող ճիշտ կազմակերպել ոլորտը, եթե չհասկանամ խնդիրները, չտիրապետեմ դրանց, չպատկերացնեմ ինչպես տեղավորեմ այս խնդիրը առողջապահական մյուս խնդիրների մեջ»,-ասաց  Արա Բաբլոյանը։

Նա նշեց, որ «Արաբկիր» բժշկական համալիրում  ստերեո-ԷԷԳ-ի ներդրումը թույլ տվեց դժվար ախտորոշվող դեպքերը  շուտ  հայտնաբերել և քիչ ինվազիվ միջամտություններով տալ ամենածանր խնդիրների լուծումը։  

Պրոֆեսոր Էդգար Հովսեփյանի անվան 4-րդ կլինիկական նյարդաբանության գիտաժողովում անդրադարձ կկատարվի նաև էպիլեպսիայի բուժման մեջ վիրաբուժական տարբեր մոտեցումներին, արթուն կրանիոտոմիայի կատարման առանձնահատկություններին, ինչպես նաև արտակարգ իրավիճակներում անվտանգ գործողությունների քննարկմանը, Էպիլեպսիայի առաջացման մեջ ներգրավված նոր գեների հայտնաբերմանն ու գենետիկական բուժման արդի մոտեցումներին։

Published by Armenpress,